Напалеон Орда (1807–1883), наш славуты зямляк, пакінуў багатую творчую спадчыну, захапляўся музыкай, выяўленчым мастацтвам, літаратурай, удзельнік паўстання 1830–1831 гадоў.

Мастацкую адукацыю Напалеон Орда атрымаў падчас эміграцыі ў парыжскай студыі вядомага майстра архітэктурнага пейзажу П’ера Жэрара. З пачатку 1870-х гадоў актыўна падарожнічаў па землях былой Рэчы Паспалітай і замалёўваў старадаўнія замкі, магнацкія палацы, шляхецкія сядзібы, цэрквы і касцёлы, мясціны і краявіды. Усяго было створана каля тысячы акварэляў і малюнкаў.

Па гэтых малюнках з 1873 па 1883 год друкаваліся папулярныя альбомы пад агульнай назвай "Album Widokόw Historycznych Polski poświęcony Rodakom zrysowany z natury przez Napoleona Ordę". Усяго выйшла з друку 8 серый з агульнай колькасцю літаграфічных аркушаў 260, з іх каля 120 прысвечаны беларускім мясцінам (у сучасных межах). Друкаваліся альбомы ў літаграфічнай майстэрні Максімільяна Фаянса (M. Fajans) у Варшаве накладам звыш за 1000 асобнікаў. Усе аркушы выкананы літографам і мастаком Алаізам Місіровічам (Alojzy Misierowicz).

Нягледзячы на абмежаваную колькасць падобных літаграфій на рынку, аркуш у добрым стане можа каштаваць усяго 150–200€. Асобныя аркушы каштуюць даражэй, віды буйных гарадоў альбо легендарныя мясціны могуць быць ацэнены ў 400–500€. Зрэдку сустракаюцца ілюмінаваныя аркушы.