У Мінскай гарадской ратушы ствараецца картаграфічны кабінет. Таксама тут падабраны рэтраспектыўны графічны матэрыял па гісторыі Мінска. Экспазіцыя прыемна ўражвае атмасферай старасвеччыны. Сцены занятыя старадаўнімі картамі і планамі, на жаль, значная колькасць з іх копіі. Спадзяемся, з часам большасць з іх будуць заменены арыгінальнымі аркушамі.

З'яўленне назова Русь Белая (Rossia Biancha) на картах ілюструецца фрагментам вядомай карты Фра Маура 1459 года. Знаходзіцца назоў на поўначы ад межаў сучаснай Беларусі і адносіцца хутчэй да Наўгародскай рэспублікі – аднаго з наймагутнейшых цэнтраў рускай культуры. Такое размяшчэнне можна бачыць на некаторых картах 15 – пачатку 16 стагоддзяў. Пасля заваявання Масквою Вялікага Ноўгарада тэрмін Белая Русь набываў рознае значэнне і лакалізацыю ў залежнасці ад палітычных абставін. А з 18 стагоддзя назоў Белая Русь усё часцей з'яўляецца на "тутэйшых" паўночна-ўсходніх землях сучаснай Беларусі.

Самым старым экспанатам з'яўляецца аркуш з "Касмаграфіі" Себасцьяна Мюнстара з познегатычнай картай Каралеўства Польскага. Карта створана на аснове карты Паўднёвай Сарматыі (1528) Б.Вапоўскага, яшчэ ў Пталемееўскай традыцыі. З невялікімі зменамі ў загалоўку карта выходзіла ў "Касмаграфіі" недзе з 1540-х гадоў. На карце пазначана Літва (Littaw), з гарадоў княства пазначаны Вільня, Горадня, Кіеў, Смаленск.

У экспазіцыі можна пабачыць арыгінальную вялікую карту на французскай мове "Каралеўства Польскае і Вялікае Княства Літоўскае пасля найноўшых назіранняў пасярэдніцтвам сэра Ле Ружа каралеўскага інжынера географа", выдадзеную ў 1745 годзе. Карта выдадзена за часамі праўлення саксонскай дынастыі і адпавядае тагачаснаму тэрытарыяльнаму ўкладу Кароны, Вялікага Княства і памежных земляў.

Цэнтральную частку сучаснай Беларусі ахоплівае падрабязная карта "Менскае, Мсціслаўскае, Полацкае і Віцебскае ваяводствы ў Літве" італьянскага выдаўца Антоніа Затта. Карта датавана 1781 годам і выйшла ў атласе "Atlante Novissimo, Illustrato ad Accresciuto Sulle Osservazioni e Scoperte...".

Таксама прадстаўлена багата копій карт і планаў і некалькі арыгінальных карт 19 стагоддзя заходняй часткі Расійскай імперыі.

Па копіях ваенна-тапаграфічных карт 19 – пачатку 20 стагоддзя цікава прасачыць значныя змены менскага прадмесця, былыя навакольныя вёскі ўжо паглынутыя горадам, памятка аб іх засталася ў назвах раёнаў, вуліц і станцый метро.

Наведаць гарадскую ратушу можна штосуботу з 12.00 да 15.00.