РУП "Белкартаграфія" выдала двума асобнымі сшыткамі ўсе старажытныя карты, якія друкаваліся ў “Вялікім гістарычным атласе Беларусі" (у 4 тамах, 2009–2018).

У “Рэпрадукцыях старажытных карт” змешчаны 22 выявы, амаль усе 16 стагоддзя: Пталамей, С. Мюнстар, Б. Вапоўскі, С. Герберштайн, В. Градэцкі, Г. Меркатар і інш., у тым ліку гравюра з відам Горадні з Браўна і Хогенберга, рэдкія “Карта Полацкага ваяводства” і “План аблогі Полацка войскамі Стафана Баторыя” 1579 года С. Пахаловіча (не з арыгіналаў), карта М. Струбіча, а таксама Эбсторфская карта свету 13 ст. Складальнік нарыса В.Л.Насевіч, 40 старонак, тыраж 1000 экз.

У зборнік “Беларускія землі на картах XVII – другой паловы XVIII ст.” уключана 21 выява: ад радзівілаўскай карты ВКЛ да вядомай гравюры “Польшча (Рэч Паспалітая) пасля першага падзелу” 1773 года. Тут цікавыя карты “Вялікае Княства Літоўскае і Беларусь” Гіёма дэ Баплана (першая, дзе назва “Белая Русь” вынесена ў картуш), “ВКЛ з падзелам на ваяводствы і паветы” Няпрэцкага-Маера (карта датуецца 1749 годам, але прыводзіцца яе пазнейшы варыянт) і, вядома, рэканструяваны фрагмент страчанай рукапіснай карты Караля Пертэеса 1770 года. Складальнік нарыса Л.Р.Казлоў, 44 старонкі, тыраж 1000 экз.

Падборка карт досыць цэльна паказвае, як мяняліся геаграфічныя уяўленні пра сучасныя землі Беларусі.